Le blog de crimonjournaldubouquiniste

Ch'est ch'plus bieu oésieu d'min gardin. Ch'plus malan eussi. Quind al' déploait ses grindes ailes, m'n' agache, chés eutes volatiles, i trachent. Chés moénieux, ch'merle moqueux, pis s'fanme, el'merlette, ch'cope d'tourterelles, i savtent qu'i ne fonte point l'poéds. Jacache, al prind tout' l'plache. Pie Jacasse avu sin bieu plumache noér pis chés accints bleutés d'sus chés ailes et in tiot molé d'vert d'sus ch'queue. Ch'l'agache, ch'est vraimint fantastique, al' o éne mémoére étonninte : al s'souvient parfaitemint d'ses cachettes où c'qu'al o muché ses tiotes réserves à minger. Conme chés corbacs, ch' l' agache, in plus de s'mémoére du diab', al est capab' d'appreind' et pis minme de s'vir pis de s'miler dins in miroèr. Al est eussi capab' ed'prévenir ses comparses si al o perchu conm in dinger ou éne menache. Al peut coère apprind' à ses éfants c'qu'al o apprind elle-minme plus jone.

Paroait qu'des chientifiques qui étudient chés oisieux, d'z'éthologues in molé ornithologues, i z'ont vu d'z'attitudes, des comportemints avu quéque cose qui r'sanne à du sintimint, conm d'el compassion des humains. 

Chés agaches lo, al z'étouétent r'groupées tout eutour d'éne agache qu'al étoait meurte et pis, al' lui avoétent apporté de l'herbe, conm por li foaire éne tiote cérémonie de funérailles. Preuve qu'chés bêtes, minm à pleumes, pis à tiotes têtes, al n'sont point si bêtes.

© Jean-Louis Crimon