Le blog de crimonjournaldubouquiniste

In bieu jor, chès bind' blanques, all' sont apparues dins l'rue. Ch'étoait l'fan finale d'ech timps des cleus. Chés cleus ont disparu. Un clavier d'bindes blanques pour pianoter du pied ch'bitume. Ch'passage cleuté, il o d'venu ch'passage piétons. 

Traverser dins chés cleus, éne esprechion qui n'o pus cours énhui. Ene phrase qui n'vaut pus un cleu. Chés grosses têtes in cuiv' n'indiquent pus chel k'min à suiv'. In parlant, des foés, o disoait coère in mollé "passage clouté", pis on o vit' dit tertous "passage piétons". Chés piétons, ch'est fin connu ed'puis fin longtimps, cha traverse in binde. Pus ou moins organisée. A part dins chés manifestations. Quand chés gins, i n'ont pus qu'assez ed'travaller por des cleus. Alorse, ch'est l'marée humaine face à l'eut' marée, l'maréechaussée. Marée qui déferle dins l'ville, débordant ed'toutes chés rues. Por brailler à ch'pouvoièr ed'chés possédints c'qu'i n'veultent jamoais intind'. La colère populaire qui déborde chés trottoèr pis chés plaches, chès carrefours. Chacun veut y prind' es' plache. Ch'pouvoèr, li, i veut mater ch'peup'. Lui river sin cleu. Chés manifestints, i peuv'tent t'nir des heures, pis des heures, si i gno point des... heurts. D'el castagne, des coeups d'matraques, des grenades lacrymogènes, ou bin pir', des coeups d'fusils à balles ed plastic à t'crever des z-yux. Qu'on n'o minme pus chés z-yux complets por pleurer chés z-yux perdus. Pis d'in coeup, sins prév'nir, cha s'arrête. Fin d'el manifestation. Tertous i doév'tent rintrer à leu moéson. Chés gardes mobiles font les z'immobiles, pour barrer l'rue à chés automobiles. Dins leus seuliers à cleus. Cleu du spectacque : ch'l'escorte cleutée. Des cleus, des cleus, qui maugréent chés gins qu'i z"ont l'sintimint d's'et' foait coère in coeup berné dins l'histoère. Z'ont déimbuler da l'vill' por des cleus. 

In bieu jor, por seur, Ch' Lafleur i l'aimeroait bien leu river leu cleu à tous chés ocleux qui nous gouvern'tent, pis qui nous malmèn'tent. Enhui, l'soèr, i tomb' coère vit'. Foait bin tôt nuit. 

Des cleus, des cleus, ch'est dins ch'ciel qu'ech Lafleur il en voét d'in coeup, quind chés étoéles s'allum'tent pour éne bielle nuit bleue... cleutée de bieux cleus... jaunes.

© Jean-Louis Crimon

Ch'étoait carrémint ch'match d'l'énnée, ch'match à n'point perd', même si ch'étoait surtout' ch'match impossib' à gaingner. Ch'match contre ch'PSG du Qatar. L' Paris Saint-Germain d'chés Emirs. Ch' l'ét'chipe d'chés milliardaires. Bin nous eutes, chés lideurs de ch'bas d'tableau, chés deuzièmes d'ech classemint d'la fin, os z'o rudemint malmenés, chés gars-lo qu'i croéyètent p'tét nous foaire minger chés paquerettes d'nou terrain ed' Renancourt. 

Feut dir' qu'ech Costaricain Navas dans les cages, ch'est carrémint le Machu Picchu, éne vraie citadelle Inca. Ouais mais, ch'qui ne savoètent pos chés parigots tête de (gris) veaux, ch'est qu'Lafleur, l'veille d'ech' ch'match-lo, il o payé troés bistoules à Ch'Luka Elsner pou li esplitcher s'méthode. Lafleur il o dit à ch' l'intraineux d'chés Amiénos lo, qui vinchent du Congo ou du Sénégal, ch'a li est égal, mais qu'ech preum' des règles du fotboll, l'mélieur définse, ch'est l'attaque, jamoais question d'ertchuler. Feut toudis défindre en attaquant. Si os respectez l'méthode à Lafleur, ch'est troès zéro pour Anmiens, avint l'fin d'el preinmiére mi-timps ! 

L'preuv' qu'ech Lafleur i l'ovoait vu juste, ch'tableau d'affichage i n'in clignotoait d'plaisi : 3 - 0 à l' quarintième minute.  Ch'traval, i l'étouait foé, pis rudmint bien foé. Chés Parisiens qui nous r'béyettent de heut in arrivint sus l'terrain, i z'avoètent leus zyux dins leus keuchures, et dins ses boés, leu Navas l'étoait à la ramasse. 

Os l'savez bien, si os avez rbayé à l'terlévision ou intindu à Frinche bleu Picardie, pis minme chés cominteux professionnels d'la RMC Radio i l'ont dit, pis redit : c'étoait incroyab. Mais c'qu'i n'ont point dit, chés baveux intarissab d'el presse fotbolistique, - sins doute qu'ils ne savtent point -, ch'est qu'Amiens, depuis 1960, all' est jum'lée avec... Dortmund ! 

O m'voyez v'nir. A m'n'idée, ch'Tourrell', comme i dis'tent dins ch'poste, Ch' Thomas Tuchel, si o préférez, i devroét vite foère ch'débriffe de ch'match nul à Amiens, quatre buts partout, avint d'aller s'affronter avec chés Allemands d'la Ruhr.

Quat-quat, Qat-Qat, Qatari, Qatari, et pis, à l'fin... Quata... pleure.

Môssieur Tuchel, avuc l' qat'-qat' dins vou' gamelle, sins vous foère l'courte échelle, o d'vroétte réfléchir à l'maxime ed'Lafleur quind i s'prind por La Fontaine : Anmiens jumelée avec Dortmund, cette leçon vaut bien une déroute, sans doute !  Allez, adé, à la revoyure !  

© Jean-Louis Crimon

Ch'est l'sondache d'el jornée. Toutes chés radios et pis toutes chés terlévisions, i vontent l'bégayer, tout' les heures, com' si falloait qu'cha nous rint' dins nou têt' de futurs voteurs.

BVA - Orange, jeudi 13 février 2020, 6 heures du matin : 

7 Français sur 10 se déclarent satisfaits de l'action de leur Maire et de son équipe. 

Z'auront bon em' buriner avec cho comme si ch'étouait éne vérité incontournab', inoxydab', indiscutab', cha n'vo mie m'foaire canger d'min avis : feut vraimint equ'nous eut', à Anmiens, on cange d'étchipe municipale. O n'peut pus viv' avec des gins qui dirigent l'Cité sans jamouais te d'minder t'n'avis pindint 6 énées, pis qu' à in moès d'el fin d'leu mindat, i s'rappelltent qu'i n'sont qu'locataires, et surtout pos chés propriétaires ed' l' Hôtel de Ville.

Dame Mairesse, all' vient ed'm'écrire - fin, pas à mie personnellemint - à tous chés citoyens d'el vill' d'Anmiens por - miraque ! - nous d'minder nou avis. Sur éne feulle rectou versou, aveuc es' fidgure in couleurs, el' Brigitte all' souhaite qu'ej li disse c'que Lafleur i pinse ed' l'environnemint, d'l'attractivitché d'Amiens pour l'emploais, pis d'la tranquillitché publique. J'peux dire Brigitte, pis l'nommer par sin prénom, pisque ch'est ell' même qu'all' foait des visites dins chés quartiers sous l'mode "Bonjour Brigitte !"  Pour aller vir chés gins qu'all' n'o point vus pindint six ans. Ch'est quind mêm' fin biau ch'métier lo ed' politicaux !

Ben mi, j'vos l'dis, Ch' Lafleur, ch'est point "Bonjour" qui vo li dire, à l'Brigitte, a n'foait pos in pli, ch'est... "Adé ! "

Ou si o l'voulez in frinchais bien élevé, c'est : Au Revoir !

Alors sans aucune hésitation, Ch' Lafleur i li dit, à l'Dame d'el Mairie : Au Revoir, Brigitte !

© Jean-Louis Crimon 

Quind Ch'Lafleur, i l'o un coeup d'cafard, éne tiote déprime, i s'in vot mucher s'tr'istesse dins sin gardin. I cante por li minme : févriou, févriou, cha n'est mie coère ch'moés doux. Chés premières fleurs, alles sont déjà lo. Fleurs préférées ed' Lafleur : chés perche-neiches ! Lafleur i n'est follemint ker à sin tchoeur. Ch'est du bonheur doux d'el froèdure. Ch'est du calin à sin viux tchoeur. Tiotes clocquiettes qu'all' s'muchent et qu'all' s'démuchent à tout momint. Un coeup d'vint, éne grosse pleuve, os n'les voièt plus. Un tiot solé qui s'ramène, z'é rev'lo à dodeliner leu tiotes têtes pinsives. Chés perche-neiches, pardon si j'abuse, all' sont chés flocons qu'ech' ciel i nous r'fuse. 

Bon, a kange d'ech' climat alentours. Os sonmes dins ch'timps d'el campagne électorale, l'timps d'chés grinds minteux. Grinds diseux, tiots faiseux, quoé qu'on in pinse. Alorse, in tiote reuverie éd Lafleur, cha n'put mie foère éd mau. Poser sin tchul su éne cayelle, s'assir, pis prind' chinq minutes à rêvasser d'ech timps passé, d'chés rituels d'i gno tchèques énnées... Ch'reuve ed'Lafleur ? r'tomber in éfance, dins le moéson d'Tante Laure... La vir' s'foère kauffer éne chicorée su ch'fu, pis ch'cot qui kauffe sin tchu à ch'fu...

Pis un bieu silinche qui s'installe dins l'moéson : ch'fu qui ronronne, ch'cot qui ronfle, ou bien l'inverse, l'tchoeur à la renverse. 

L' vielle Tante qui vo r'bayer à l'fernette, tirer à mitan ch'ridieu, lire l'couleur d'chés cieux, pis qui vo dire l' météo du soèr en chinq mots :  i vo tcherre des neiches.

© Jean-Louis Crimon 

Lo, ch'est tout' ! A s'd'minder c'qu'i o dins l'tête d'ech femme-lo. Déjo, à l'réunion d'el présintation d'chés huit têt' ed liste, all' n'avoait pos grinmint impressionné chés gins ed' chés Comités d'quartier. Simp', dins ch'group' ed' Lafleur, en tchinze minutes, alle avoait dit "Moi-je" au moins chint cinquinte foés. Qu'Lafleur à l'fin d'sin temps d'parole, à l'femme-lo, il ovoait hésité à li dire : Dis donc, toé, l'femme qui vut êt' Mairesse d'nou ville, t'os dit tout l'timps "moi-je", "moi-je", mais t'auros pu nous d'minder à nous zeut' ce qu'on veut ? T'auros pu dire : et pis vous, qu'est-ce qu'o voulez ed' nouvieu dins l'ville d'Anmiens ? Un truc comme cho, pour nous foaire comprind' et qu'tu n'es point trop, comme on dit achteur, égocentrée. 

Blabla, blablabla ! L'miux, ch'est tiot Blaise qui l'o foait r'marquer à Lafleur. Ch'local ed campagne d'el femme-lo, il est putôt cocasse. Rue Flatters, si ch'est pos... flatteur. Chintre ville, por seur, ch'est miux qu'ech premier pied à terre, derrière l'Gare d'chés trains tojours in r'tard, dins ch'quartier La Vallée. Ch'local d'achteur', ch'est fin luxueux. Comme diroaient les agences : superficie impressionnante, rue passante, rue commerçante, sins autchun dout', mais ch'l'inseigne, all' met tout in déroute ! Ch'nom d'ech' magasin, il o resté accrotché au-d'ssus d'ech nom d'el candidate. A foait in télescopache fintastique.

Ch'nom ed'l'ancien commerce, tojours visib', ch'est "Ma literie". In truc parelle, cha n's'invente pos ! L'candidate qui vouloait nous indormir, all' créche à Ma Literie. Frinchemint, y'o des gins, i z'ont des c'mins prédestinés. Dins un premier timps, elle essaie ed' nous indormir, dins in second timps, elle nous ouvre Ma Literie. Chi avec cho, all' n'o point éne bielle "couverture"... de s'campagne... par "Ch'Courrier qui part", ch'est à rien n'y comprinde.

En fait, mi, Lafleur, j'o d'viné pourquoé que l'femme-lo, qu'all' s'déclare "Sins étitchette" all' o gardé ch'l'étitchette d'l'inchienne boutique. C'est simp' : "Ma Literie" cha peut inchiter chés gins à voter in masse pour elle. Histoère d'li garintir, por s'mint'nir à ch'second tour, un boen patchet d'voéx, quequ' kose comme in... boen matelas.

© Jean-Louis Crimon