Le blog de crimonjournaldubouquiniste

Paroait qu'ech Tour de Frinche, i n'vo point s'courir ch' t'énnée-chi. Inimaginab' éne décision parèle. Tout cho à cose d'ech Coronavirus d'chés Chinoés. Décidémint, in tiot bétal microscopique qui tue des dizaines et p'têt' des chintaines de milliers d'gins et qui peut t'bersiller tout' éne planète, a n'est mie possib'. Chés Jux Olympiques au Japon, reportés. Paris-Roubaix, décalé. Roland Garros, décalé. L'Euro de fotball reporté. Les fins de campionnats ed' fotball, tout parèle. Chés Ceupes d'Europe, chés Ceupes de France, et pis, sins doute eussi, ch'Tour de Frince. A troès moés tout pile d'ech départ, prévu à Nice, ch'samedi 27 ed' juin. Por éne arrivée sur chés Camps Zélisées, ch'diminche 19 ed' juillet. Cha m'désole.

Min caracole, dins min gardin, il o ch'maillot. Ech' maillot gane. I caracole in têt' min caracole. I n'foait point ch' Tour de Frince, i foait ch'tour ed min gardin. Bah, ch'est déjo rudmint bien. A m'foait m'raminteuver in bon gars d'Picardie, minm avu sin nom breton. In fiu picard qui l'o foait ch' Tour de Frinche avu chés plus grinds cyclisses ed tous chés timps. Chétoait in 52, pas 52 avant J-C, ou alors in 52 avint Jacques Chirac. Nan, ch'étoait en 1952, ch'premier Tour ed Frince ed Pardoën. Pierre Pardoën. Tour de Frince gangné par el campionissimo Fausto Coppi. Pardoën, carrémint totalemint intchonnu à ch'départ, vu qu'il avoait passé professionnel, juste avint ch'départ, donné à Brest. S'n'étchippe, ch'étoait l'formation Centre-Nord-Est, Directeur sportif, in délommé Sauveur Ducazeaux. L'o démarré in fanfare ch' Picard pisqu'il o bien failli prind' ch'maillot gane à l'arrivée à Rennes, battu au sprint par ch' Belge Rik Van Stenbergeen.

Y'o in fameux liméro du Miroir Sprint, chti du 27 Juin 1952, qui gno deux pages intières écrites sus ch' Pardoën, né à Anmien, le 8 août 1930, et qui n'avoait point coère 22 ans por sin premier Tour de Frinche. Couru, pis bien couru, avu des grinds monumints qui s'appeloétent Fausto Coppi, Gino Bartali, Raphaël Géminiani, Rik Van Stenbergeen ou Wim Van Est. Paroait minme qu'ech' Fausto Coppi, boin péqueux, boin cacheux, i l'o r'vu ch'Pierre Pardoën dins chés marais ed Long, en 1954, por éne partie d'cache à la hutte. Louison Bobet l'étoait v'nu eussi accompagner s'n'ami Coppi. Mais ch'est éne eute histoère... Qu'ej vous racontero éne eute foés.

© Jean-Louis Crimon

A mi, Ch' Lafleur, o n'la foait point ! Y'en a vraimint qu'y n'ont rien d'bon dins leu panche. A quoè qui pinsent por invinter d'parèles idioties in parèle situachion. L'histoère ed' laissier ses commissions dins s'carette mobile pindint éne heure et d'mi, produits frais ou congelés, d'in coeup, ej'm'sus dit que ch'conseil lo, n'étoait point bien catholique. Qu'cha vinche soiét disint d'ech Samu42 n'm'a pas impressionné por autint. Pis, conme par hasard, ch'photo pis ch'nom d'ech gars qui l'affirmoait cho, z'étoètent invisib', conm coeupé au montache. Ch'soé-disant "Médecin régulateur" l n'm'o mie simblé bien régulier.

Ch'l'esspression "il supplie" m'o eussi simblé in mollé sonner faux. In médecin, a n'supplie point, a d'minde ou a exige. Ch'est mie éne phrase d'toubib, l'phrase lo, ch'est éne phrase d'tchuré ou bien d'Pasteur. In Pasteur pos granmint pasteurisé, d'ailleurs ! Ch'l'intitué "Samu42", ch'étoait por imberlificoter ch'lecteur ou ch'lectrice, por imberlurer chés gins, chés gogos qui croétent facilemint tout' c'qu'o leu raconte. Surtoute qu'chés cartons à j'ter ou chés keussures à laissier dins ch'garage ou dins l'appintis, cho, ch'est vrai. L'Javel diluée tout parèle. Seuf que ch'est point passequ' y o deux ou troès trucs vrais qu'ech quatrième, i sro vrai eussi.  Ch' Lafleur, i n'est mie in pichon equ'tu l'amorces conme cho. Avuc éne si grosse fichelle. Minme si ch'est pour s'défoaire d'in virus eussi dingereux qu'ech Corana d'chés Chinoés. 

L'daraine phrase : "Passez l'information a plus possible de personne", (sans "s" !), al' doait eussi foaire comprind' qu'ech truc lo n'est qu'in fake news, conm i distent in frinçé, pour point dire "fausse information" ou tout simplemint "mintirie", conme o dit ichi.

In vrai médecin régulateur, in vrai de vrai, il 'auroait dit, pis écrit : "Partagez l'information avec le plus grand nombre". 

© Jean-Louis Crimon

Renaud Deschamps, ou putôt Renaud des villes, ch't'honme-lo, i l'est fin touchant. Ene bielle allure, éne bielle fidgure, pi éne certaine esstature. O s'dit tot'd'suite qu'chi ch'est point por ch'coeup-chi, sins autchun doute qu'ché sro por ch'prochain coeup. Il o tout' d'in futur Maire d'Anmien. Un tiot remake ed' Gilles de Robien. Juste in molé pus timide, pus réservé. Je n'veux point dire in certain manque d'assurince, vu qu'i sonte tous les deux dins ch'métier d'chés assurinciers. 

Seur qu'i sro au deuxième tour. I l'o bien rodé sin discours. Point trop à droète, point trop à gueuche. In bieu sourire in bindoulière por aller cacher chés voés qui feut por gangner. Feut point oblier qu'i l'o été Ch' Maire-Adjoint du Commerce d'l'étchippe à l'Mairesse sortante. Ch'gars-lo n'est point in inconnu, i connoait minme granmint d'monne. L'o l'air, lui, d'êt' putôt bien aimé sus l'plache d'Anmien.

Dins sin programme, ch'Bus gratuite por chés pus ed 60 énées, ch'est éne boène idée. Pus courageuse qu'tous chés eutes, d'Birgitte Fouré à ch'Julien Pradat, in passant pis rapassant par ch'Porquier, qui mettent cha sous conditions ed'ressources. Sins oblier qu'li, i n'oblie point chés pistes cyclabes et qu'i sait foaire l'différinche entr' éne bande cyclabe pis éne piste cyclabe. Point l'cas d'tout l'monne dins chés candidats à l'Mairie. 

Ch'quadra Deschamps, ouais, à m'n'idée, ch'est in coeup gangnant... A ch'prochain coeup ! 

© Jean-Louis Crimon

Ch'ti qui l'o foait ch'meilleur intertien, seûr, à m'n'avis, ch'est li, ch'fiu à Gérald Maisse, Cédric ed d'sin prénom. D'intrée, il o joué ch'ju d'chés tchestions pis d'chés répons, sins du tout' s'débiner conm' granmint d'ezz eutes. On sint qu'i connoait s'ville pis ses dossiers. Feut dire qu'il o déjo été conseiller, dins ch'l'étchippe d'ech socialisse Demailly, même si, à c'que Lafleur il o coprind, a n'étoait point ch'grind amour. En-n'hui, ch'est li qui conduit éne liste vraimint d'gueuche, avuc in molé d'insoumis. Pis ch'est ch'ti qu'i l'o ch'meilleur projet pour rind' hommage à chés fusillés d'el Citadelle : foaire in Centre d'études historiques sur la Résistance. Vla éne idée qu'all nous cange d'chès simpiternelles radoteries d'sus ch' Grind Jules. I n'o pus qu'assez d'êt' à tout bout d'champ... vernis d'chez Vernis, par chés monomaniaques ed' Verniens !

Ch'Lafleur, i l'avo prind avec li chés deux livs qui sonte éne bielle tiote base por parler d'chtulture. Je me souviens d'Amiens et pis L'Hortillon des mots. Avec l'idée ed'titiller in molé chés candidats d'sus leu niveau littéraire. Manon Lescaut, Choderlos de Laclos pis Roland Dorgelès, Lécavelé, d'sin vrai nom d'naichince. A l'tchestion sur Dorgelès, ch'grind dadais-lo d'Bienaimé, numéro 8 dsus l'liste ed Dame Fouré, i s'est énervé tout d'suite in braillant : vous n'allez pas m'interroger sur tous les écrivains que je ne connais pas ! Cho bien foait rire ch'grind ferlapier ed' Lafleur. C'est pas l'oral du Bac ! qu'i l'o coère rinfiqué ch'l'ignorant. Bah si, mi fiu, chi t'es candidat à diriger nou ville d'Anmiens, tu doès in connait' in molé sus s'n'hitoère, pis sus chés écrivains qui sont nés ichi. Pinsez don, ch'gars-lo i l'o grimpé sus chés grins g'vaux pis il o dit à Lafleur com' pour pour l'vexer : si tout le monde vient ici pour vendre ses livres... Erreur, min père, ch'est ti qui vient vind' tes idées, qu'Lafleur i o racacher dins s'gamelle. Minme si d'z'idées, ch'gars-lo, de c'qu'il a montré ch'soèr lo, i gn'o mie grinmint ! Ch'Lafleur, qu'il avoait té coési conm' modérateux par chés étudiants ed'Science Politique d'Anmiens, i l'o foait s'n'ouvrage ed'questionneux impertinent. F'sant comprind' à ch'Biennaimé, qu'in dépit d'sin nom, i n'l'étoait point tant qu'cho !

Nactieux, magnéreux, ignorant qui s'voudroait chef du gouvernement, mais qui froait miu d'er'torner à ses études ! Lafleur, i l'o pinsé à part li minme : Chés gins lo qui veul't t'comminder, min fiu, chés in mont d'fiers-tchus qui n'connaissent point grind coeuse, por point dire erien du tout. Ch'est pos d'vrais Anmiénoés, sonté juste - minme chi ch'est point aimab' por min beudet- des Ânes miénoés ! 

© Jean-Louis Crimon

L'fanm' lo, j'n' el' coprindroès janmoés. All' veut toudis nous foère matcher du brin pis nous foère croère qu'ch'est du caviar. Avuc in aplomb incroyab'. Mais ch'pus miux, ch'est qu'all o foait in rud' de bieu lapsus l'eut' foés à Télé Wéo. All vouloait parler d'chés trains toudis in r'tard, et all' o dit, sins rire, chès bus toudis in retard. A foait sourire in molé, mais i n'o pos eu in por r'bondir sur in aveu parèle et pis t'el racacher ed'volée. Ch'Lafleur i trépignoait d'vint ch'poste à voloèr prind el parole pis ech' micro. 

En plus, janmoès in mot por ch'ti qu'il l'o porté seur chés fonts baptismaux d'el politique, ch'dénommé Gilles de Robien, ch'tiot Prince au sang bleu qui l'o prind l'Mairie à chés rouges, chés communisses, en 89. In mil neuf chint quatre-vingt neuf, falloaitt l'foère. Por ch' deuchintièm' énnée d'el révoluchion frinçaise. In fiu d'el vraie noblesse à l'Moéson du peuple. In rud' coeup porté à tous chés gins d'gueuche ! De ch'thomme-lo qu'i l'o foait princesse, Dame Mairesse, all' n'in parle janmoès. In molé trop fière-cul. 

Mais cha n'est mie tout'. Ch'dernier coeup de l'étchipe à chés manettes, pis qu'i veul'tent garder chés commandes, ch'est in rud'bieu catalogue ed'tout c'qu'i z'ont foét pindint leus six énées aux affoères. Des pages intières d'éloges et pis d'photographies sur deux colonnes "Avant" pis "Aprés". Feut traduire : Avant, ch'étoait carrémint nul. Après, ch'est tellemint miux. Photos forchémint tertoutes très choisies. Conme ch'est toudis l'cas dins ch' JDA, le Journal municipal. O n'y parle que de ch'qui vo bien, janmoès de c'qui vo mal. 

Seul problème de ch'bieu catalogue ed' 32 pages, tout in couleurs, infitché dins tout' chés boétes à lett' d'chés Anmiénoés, i gn'o point imprimé ch'nom de l'Imprimeux et chés noms d'cheux qu'ont écrit chés artiques élogieux. Ch'documint lo, à l'idée moqueuse ed'Lafleur, n'srait-ti point in molé... hors-la-loé ? La loi électorale, comme i dis'tent ceux qui sav'tent.

© Jean-Louis Crimon