Le blog de crimonjournaldubouquiniste

M'ville, gn'o des jours, ej' ne la r'connoais pus ! Chès bus, y s'dédguis'tent in tramways, chés gins d'droète, i r'béyent in tiot mollé à gueuche, pis chés gins d'gueuche, i souritent à droète. Ch'est à chti qui sauro miux convainc' chés indécis. Tout' sanne permis. D'chés idées, pis d'chés idéeux, ch'est l'grinde foère ! Quelle affoère !

Chés anonyms, i veul'tent êt' célèbs, pis chés in mollé célèbs, i z'aimeraoètent êt' in mollé dins l'anonymat. Ch' l'hiver, il o d'z'airs d'été, y'o des jors ed'janvier qu'o trinspire, pis qu'o reuve ed' frimats. Tout est berluré, dins ch'ciel, com' sus l'Terre. Chés keuse d'el planète ronde, qu'all' n'tourne pus très rond. Ch'Lafleur, i n'coprind point tout', mais i s'rappelle éne phrase d'sin père, qui disoait : chés gins intelligints, i sont bêtes ! A l'énervoait d'intind' cho, quind il étouait piot, ch'Lafleur, mais achteur qu'il o l'âge d'sin père, i l'est bien forché d'el croère : Les gens intelligents, souvent, se comportent comme s'ils étaient stupides.  

A c'mincher par el' heuteur d'chés bordures ed'trottoèrs, qu'el Mairesse all o foait r'monter grinmint por être à heuteur d'chés marche-pied ed'chés nouvieux bus, chés fameux Némo qu'même Jules Verne, seur et certain, i n'aimro point tint qu'cho. 

Dins tout' chés villes chivilisées, ch'est ch'marche-pied de ch'bus qui descind, pis dins nou ville d'Anmiens, c'est l'bordure de ch'trottoèr qu'all a dû r'monter ! Chi c'est point l'preuv' qu' chés gins intelligints, i sont' bêtes...

Sur ch'coeup là, qu'o n'dise point à Lafleur qu'ch'est li qui l'o tort. A pourro ben l'énerver in matximun, ch't'homme. Ch' Monde, i d'vient fin fou. Pis partout. Mais, ch'problèm, ch'est qu'i gno mie grind monde por el'reconnoait'. Ch'Lafleur, i n'est quasimint seur, a vo mal finir, tout cho. Ch'l'accidint définitif n'est pus très loin. 

A forche ed' laissier ad'venir des queuses qui n'ont ni queue ni tête, cha vo finir par in tête à queue ! 

© Jean-Louis Crimon 

Preuf' equ'tou cho, a n'est mie bien net', ch'est l'nom d'ech' liu où qu'i z'ont foait leu fête, l'première soérée festiff', chés gins d'el liste "Amiens, c'est l'tien !" ! Ch'nom, Lafleur, i vou l'donne in mille, ça s'appelle... ch' Mic-Mac. 

Gn'o pos pus bielle fachon ed' signer chés embrouillaminis, chés intrigues, chés manigances, ch'manège, d'el constitution d'el liste d'chés simp' citoyens. Mic-Mac, ch'est point seulemint éne signature, ch'est carrémint in aveu. Ch' Lafleur, il o d'viné d'imblée chés imbrouilles. Bieux diseux, grinds minteux. Lafleur, o n'li reprindra pos d' si tôt ! Matcheux d'pulpes, baiseux d'glènes, grinds queutcheux, ch' Lafleur i n'maque point d'ech' pan lo.  ! 

Toudis in colère d's'êt' laissié convainc' ed' participer à chés intretiens d'sélection et pis de n'pos avoiér été r'tenu, i n'y'o point été au Mic-Mac, Ch' Lafleur ! Ene foés, cha suffit. I l'o dit à l'in d'chés mimbes d'el liste "Amiens, c'est l'tien ! ", à s'fachon, sins foaire ed'magnes : "Anmiens, ch'est l'tien !", p't'êt' ben por ti, mais por mi, sur ch'mode-lo, "Anmiens, cha n'est mie l'mien !" 

Ch'est quind même gonflé ed d'minder à Lafleur d'sout'nir éne liste qui n'soutient pas Lafleur. L'politique, ch'est donnant-donnant. Si Lafleur, i n'o point chés qualités suffisintes pour êt' l'un d'chés 55 noms d'el liste, feut point li' d'minder ed'trouver des qualités à ceuss' qui l'ont mis su ch'côté ! A n'est mie des manières. Même in disint qu'ch'étoait por foère d'el plache à chés éfants d'el classe populaire.

Si ch'Lafleur, li, i n'est point in éfant du peup', alors lo, feut m'esplitcher c'mint qu'chés gins lo, i sont édutchés ! Ch'Lafleur, avint d'travaller de s'tête, il o travallé d'ses mans ! Ch'est sins dout' point l'cas d'tous chés maniganceux qui l'ont r'jeté, ch' Lafleur. L'étoait OS chez Laden, pis manutentionnaire Travaux Lourds, à L'Ruche Pit'charde, pour payer ses études, ch' Lafleur. Pis ch'étoaitt d' z' heures de nuit. De minuit à 7 heures du matan, chez Laden Philips, avint qu'cha n'd'vinche Whirlpool. Pis de 21 heures à cinq heures à L'Ruche Pit'charde. A trimer pour chés frères Dian, quind Lafleur i l'étoait étudiant. A r'muer des caisses, pindint que z"eutes i r'muaient des fesses. Dins chés zinzins d'el Salle des Frinchises d'ech' Campus. 

A n'est mie étonnint si y'en o qui dis'tent qu'ch'est ch'grind maniganceux, ch'marionnettisse in chef, qui tire les fichelles ed' tout cho. Ch' Lafleur, grinde d'gueule mais boen tch'coeur, cho, i n'vut mie l'croère, pis malgré tout', il iro quind minme donner sin vote por l' liste-lo, "Amiens, c'est l'tien !", l'seul' capab' d'in finir éne foés por tout' avuc chés ocleux, chés tcheurfallis, qui tienn'tent l'Hôtel ed' Ville de s'ville d'puis six énnées, à ch'jor d'énhui.

© Jean-Louis Crimon 

Ch'cot lo, l'est fin malin, ch'est ch'cot d'min voésin. I sanne qu'i m'o prind comme in amitié. Ou plutôt qu'il o prind min gardin in amitié. D'éne amitié vraimint amiteuse. Il est lo, chaqu' matin, vraimint amiteusemint. I s'muche toujours au minme indroét. Fin, foét ch'ti qui s'muche, mais pos si muché qu'cho. Pas éne jornée sins qu'i passe et qu'i foait l'tour, éne tiote pisse par chi, éne tiote crotte par lo, manière de marquer sin territoère. Ch'est pus chez mi, ch'est chez li.

Il o d'ziux comme des perles. D'bieux ziux verts comme d'z'émeraudes in maraude. I r'baie tout ch'qui passe. In oézieux, in tiot piaf, ch'merle et même el'grinde pie, el' grinde agache, i n'o peur de rien. Dès foès, j' l'y parle et j'ai idée qu'i m'coprind. Même d'chés élections. Tout l'intéresse. 

L'preuff', min cot d'adoption, i n'o du mau à intind' à ses érelles: "Amiens, c'est le tien !" A chaque foés, i comprind "Amiens, c'est l'tchien !", pis i part à tout' vitesse comme chi qu'il avoait un tchien qu'il course et qu'il aboéroait à ses trousses. 

"Amiens, c'est l'tien !", cha, c'est fin seur, avec nou accheint pitchard, ça foait vite "Amiens, ch'est l'tchien !" Pis lo, ch'est toute, ch'l'effet attindu, i n'y est plus ! Ch'tien, i dvient ch'quien ! ça foait aboyer, ch'est tout'. L'pire, ch'est qu'avec in slogan parelle, chés idées d'el liste lo, cha n'vo p't'êt' point... mordre ! 

V'lo c'que min cot d'adoption m'o foét coprind'. Reusemint qu'o n'donne point coère ch'droét d'vote à ches cots, pache que lo, chés cots, ch'est fin seur, i n'vot'raient point pour chés tchiens ! 

© Jean-Louis Crimon 

Ch'est Tiot Blaise qui l'o mis ch'tiot artique d'ech' Courrier qui part sous l'nez ed Lafleur. A disoait qu'ech' mercredi soèr, chès 8 candidats à l'Mairie, i z'allouètent v'nir vir' chés gins pis leur parler ed'leur programme à chatchun. 

Ene réunion incroyab', carrément ech'jour du concours du plus grind minteux ! Troès heures ed'parlottes, ed'promesses, ed'gentillesses, pis d'manièresses, style : mais mon cher ami, mais oui parfaitement monsieur, nous avons besoin de votre avis et de votre soutien, dans chaque quartier de notre bonne ville d'Amiens. Bielles parlottes ed' diseux qui n'écoutent qu'eux. Pour chés Présidints d'chés comités, tertous bénaises d'êt' flattés comme i feut flatter chés tiots shérifs d'quartier.

Ch'étouait dins ch'grind Gymnase d'el rue Legrand d'Aussy, pos loin d'el Gare d'chés trains tojours in r'tard, qu'cha s'passoéte. A la tout'fin, il o fallu d'minder d'l'aide ed'tous chés gins pour r'mettre l'Gymnase en état de Gymnase. Donner in coup d'balai. Ringer chés tab', chés cayelles, pis chés tapis d'sol. 

Ch'Lafleur qui n'in minque jamoais éne, il o déclaqu'tché d'in coeup à chés Présidints ed'chés Comités d'Quartier : Bin lo, ch'est tout', ch'est bien l'preuffe qu'o z'êtes tertous des carpettes, pisqu'à l'fin d'el réunion, o ringez chés tapis !

Ah, qué rigolade, mes z'amis, Ch'Lafleur, il o grindemint été applaudi ! Même par ch'ti qui n'aimoait point trop Lafleur au début d'el réu : "Ah, Monsieur, je vous comprends parfaitement, vous êtes comme moi, pour un bon mot, vous vous fâcheriez avec votre meilleur ami..."

- Bin oui, min père, qu'ej' y'ai rétorqué, pis comm' t'es même point un comarate, Ch'Lafleur, i n'vo mie t'rater ! Ch'gars, il o souri d'sin sourire ed'niaiseux, pis Ch'Lafleur il o r'prind à pied s'route vers la Gare, alors que ch'grind dadais, i disoèt sérieusemint : Mais où est mon chauffeur ?

© Jean-Louis Crimon 

Chés z'intitulés d'chés listes, cha trinspire vraimint chés z'ambitions d'el liste en question. Comme m'dit m'n'ami, ch'prof ed' français : Rendre Amiens aux Amiénois part d'une bonne intention. Mais le slogan n'est pas aussi percutant qu'on pourrait le penser à première vue. "Amiens, c'est l'tien", ça ne tient pas la route. Amiens est féminin, mon brave. Une ville, c'est féminin. Il n'y a aucun doute. Au masculin, même si ça rime, ça sonne pas bien.

L'o point tort, ch'camarade lettré : éne ville, ch'est féminin, in patelin, ch'est masculin. A l'heure où chés fémmes, alles veulent prind' toute leur plache dins l'vie politique, ch'est point très malin de mettre au masculin c'qu'est féminin ! Fin, à m'n'idée ! J'ose point ed'mander à Sandrine c'qu'elle in pinse : ém' foutroait plutôt éne baffe su'm'tronche, éne torgnole su' min minton ed'gaviole, en m'braillant : Amiens, c'est l'tien, mais l'mandale, lo, ch'est l'tienne !

Amiens Capitale Citoyenne, cha n'vo mie aller très loin. Capitale des Citoyens, oui, Lafleur, y peut comprind' ech' que ça veut dire, mais éne ville chitoyenne, ça sonne bizarre. Seur, chés Citoyens ch'est d'z' urbains, mais l'ville, ch'l'urbaine, a n'est mie chitoyenne. Mais bon, qu'i s'berlure aux entournures, ch'ti qu'il o trouvé cho, ch'est sin problème, Lafleur i s'in tape d'el friture, ch'est po por li qu'cha cuit. 

Amiens en couleurs, j'y ai dit à ch'gars-lo, min fiu, ti eussi, tu t'berlures, l'politique, ch'est point d'el peinture : tu mélinges ch'l'élection municipale aveuc éne collection ed' cartes postales, tu touilles in ribimbelle d'z'idées qu'alles sont fin belles, mais cha n'est mie un concours d'aquarelles ! 

Ch'Lafleur qui n'est point sot, pis qu'adore ch'Fotboll, i l'aimeroait miux : "Décidons Amiens", comme Vikash Dhorasoo qui l'o inventé : "Décidons Paris" !

Cho, c't'un rude ed' boen pénalty.

© Jean-Louis Crimon