Le blog de crimonjournaldubouquiniste

Be lo, ch"est tout' ! Ej' sus allé à l'grind poste in'hui. In bon moés qu'ej' n'étouais point allé in ville, à keuse d'ech' confinemint, pis ed' tout c'qu'i distent d'sus chés gins à risques, conm' mi : pus d'soixinte-dix ins, in mollé ed kilos in trop, pis du mau à respirer. Incroyab spectaque à mes zyux d' viux : chés masques partout. Chés jon-nes, chés moins jon-nes, chés viux. Mardi gro in plin moés d'Mai. Ene tcheue ed quarinte personnes à l'esstérieur d'el'Poste cintrale, pis chés distinches d'in boin mèt' inter chés gins dins l'tcheue. N'in croyais point mes zyux. Ch'étoait conm' dins in reuv', mais ch'étoait un cauchemar. Ch'coronavirus, i nous en foait foaire, à nous eutes, cho, ch'est seur. 

Ej'sus rintré à m'moéson in molé perturbé d'ech'spectac qu'j'avoais vu. D'mes zyux vus. D'mes zyus d'viux. Grinmint ému. Grinmint berlu.

Por em'remonter l'moral, qu'j'avoais dins mes keuchettes, j'em sus mis d'sus m'cayelle ed'gardin. M'terlévion préférée, chés timps-chi, ch'est min gardin, à r'bayer chés oézieux, qui sont fin bieux, pis toudis joéyeux, toudis pleins d'entrain. Ch'bieu pinson d'chés abes, chés moénieux, toudis in ribambelle, ch'merle pis sin fiu, ch'merlot qu'ech père merle i porchasse por qu'i conprenne qu'ech gardin lo, ch'est ch'gardin d'sin père, qu'i feut qu'i treuve in eut' gardin por li-minme. Peut point y'avoér deux merles dins ch'minme gardin. 

L'pus drôle ed' toute, ch'est qu'ech famille, in troès minutes, all étouait fin complète, pisque ch'merlette al' passouait eussi d'vint mi, avu quequ'keuse dins sin bec qu'ej' n'o point bien vu à ch'début. In truc incroyab' ! In truc impensab' ! Ch'merlette al' s'étoait foait in masque nature.  Conm' chi ch'étoait dins sa nature. Avuc des morchieux d' mousse, pis des brins d' herbes séc !

Lafleur, t'es ti bête ! Coère éne émouvure por rien. N'vo mi t'berlurer avuc cho. Ch'est point in masque, voéyons ! Ch'est jusse por foère sin nid. Merlette al prépare s'layette. Al foait ses implettes. Min Lafleur, t'es ti bête !

© Jean-Louis Crimon