Le blog de crimonjournaldubouquiniste

Lo, ch'est tout', chi chés étournieux d'min gardin i c'minchent à foaire d'el "distanciation sociale", ch'est qu'ech coronavirus, il o viré. Muté pi transmuté. Os sonmes bien rendu avu ch'l'affoaire-lo. Chi os n'me croyez point, z'avoétent qu'à r'bayer l'photo qu'j'ai prinds. In vrai tableau d'ech pintre américain. Howard, j'croés. Non, a n'est mi Howard, sin nom. Ch'est Hopper. Em' photo, os povez l' warder si os volez. Ch'cadrage, i l'est impeccab'. Mi b'soin d'sermoner chés sinsonnets. Chatcun dins sin coin avuc in bon deux mèt ed distince. Tiot Blaise qui n'in minque jamoés éne, i m'o foait la remarque.

-T'es-ti bête, min Lafleur, chés zoézieux, cha n'écoute mi la radio, pis cha ne r'baie point davintache l'terlévision. C'min qui porroétent êt' au courint d'chés m'sures ed' confinemint, pis ed'dichtinchiachion ! 

Sus-ti con, sus-ti con, sus-ti con, qu'ej' y ai racaché à ch'tiot Blaise, mais attends, ej' sus con... finement. 

Tiot Blaise qui l'o tojors in tran de r'tard avu chés jux d'mots, i buse coère. Por seur, i vo p'tét' éclater d'rire dins troès quart d'heure ! Mi, j'sus frinqu'mint admiratif d'chés bestioles à pleumes. Qué fascination. Sont rudmint malan. Gn'o du gingin dins leu tiotes chervelles. Sont intelligints. A leu fachon.

A moins qu' cha soét ène manière d'rappeler, à chés humains à deux gambes qu'i s'croétent chés pus intelligints d'el planète, qu'chés bêtes à deux pattes, al n'sont point si bêtes, et qu'ch'est pas tout à fait in hasard si chés honmes qui déconn'tent, o zé surnomme "crâne de piaf" ou "cervelles d'oisieux" ! Des surpitchets qui sonte é rudmint bien treuvés !

© Jean-Louis Crimon