Le blog de crimonjournaldubouquiniste

Feut qu'ej' r'vinche su l'soirée mémorab' d'ech' fameux mercredi lo. Z'étouétent tertous lo, ou presque. Julien Pradat, pour Amiens c'est l'tien, Jean-Yves Bourgois, pour Amiens c'est vous, Renaud Deschamps, avec sin noeud pap' en bois, Fanny Ruin, la reine du "moi-je", Cédric Maisse, d'Amiens Insoumise, mais pas de la France du même adjectif, si o m'suivez, ch'tiot Porquier, prénom Christophe, ch' l'écologisse qui l'o muché dins s'liste, s'femme En Marche, la Barbara Pompili qu'all' o traverché l'rue - ché point glorieux - pour dev'nir Macronisse, Philippe Désérable, un fiu éloigné d'el fameuse Quincaillerie historique, pis Jean-Christophe Loric, pour l'équipe sortante, parce que Dame Mairesse n'avoait point voulu sortir en dehors d'sin périmét'. Po très courageuse, l'femme-lo. 

Gn'o même in qui gn'o point mantché ch'ju d'mots fastoche, preuffe qui n'avoait mie s'langue dins s'poche : Bin, l'Brigitte sortante, all' est point lo, où qu'all'est coère Fouré ?

In mollé pus sérieusemint, disons qu'i z'ont tertous bien joué l'ju. Z'ont tourné comme i falloait autour d'chés tabes, pour exposer, en tchinze minutes chrono, chés grindes lignes d'leu programme. Qu'ech' Mairesse sortante n'soait point v'nue, cha n'a pos plu. L'femme lo, l'étouait portant bienv'nue car chés gins d'chés comités ed quartiers, à c'mincher par chés Présidints, i z'avoétent un sacré patchet ed' questions à li poser. Seur chés bus, chés pisses cyclabes, chés travaux infernaux, pis seur l'vie impossib' pour chés commerces de ch' cintre ville. Sin rimplachant, ch'l'Adjoint in charge de l'Urbanisse pis du Logemint, i l'o foait l'traval, promettant que Dame Fouré recevroait dins sin Grind Burieu d'el Mairie tout' chelles pis tous cheux qui f'ront la d'minde ! 

Ch'Lafleur, i n'o pu s'impétcher d'foaire remarquer qu'li, cha foait pus d'troés moés qu'i l'o foait, sa d'minde, à deux ou troés reprisses, et qu'il attind coère ! Etre reçhu par ch'Mairesse, tu parles d'eune affoère ! 

© Jean-Louis Crimon